Вынікі выбараў у мясцовыя саветы нельга прызнаваць, бо яны былі сфальсіфікаваныя, лічыць Дзмітрый Дашкевіч
28-04-2010 15:47
Вынікі выбараў у мясцовыя саветы нельга прызнаваць, бо яны былі сфальсіфікаваныя. Пра гэта ў інтэрв'ю БелаПАН заявіў адзін з лідэраў маладзёжнай кааліцыі "Новае пакаленне", лідэр міжнароднай маладзёжнай арганізацыі "Малады фронт" (Чэхія) Дзмітрый Дашкевіч. Як паведамлялася раней, з 22 кандыдатаў у дэпутаты ад кааліцыі дэпутатам не абраны ніводзін чалавек.
"Трэба адзначыць, што этап рэгістрацыі быў больш ліберальным, чым на парламенцкіх выбарах. І хоць з 53 прэтэндэнтаў на званне кандыдата ў дэпутаты зарэгістраваныя былі толькі 22, мы канстатуем, што нашы кандыдаты галоўным чынам самі дапускалі памылкі. Аднак працэс выбараў не пакідае ніякіх сумненняў у тым, што выбары былі сфальсіфікаваныя. Прычым фальсіфікацыі праходзілі на этапе датэрміновага галасавання", — сказаў Дашкевіч.
Паводле яго слоў, адзін з кандыдатаў у дэпутаты ад кааліцыі Дзмітрый Кухлей у дзень галасавання 25 красавіка перамог свайго саперніка. "За Кухлея было пададзена ў два разы больш галасоў, чым за яго канкурэнта. Аднак, згодна з вынікамі датэрміновага галасавання, Кухлей прайграў з розніцай у чатыры разы. Такога проста не можа быць", — сказаў Дашкевіч.
У акрузе, дзе балатаваўся адзін з лідэраў маладзёжнай арганізацыі аргкамітэта па стварэнні партыі "Беларуская хрысціянская дэмакратыя" (БХД) Любоў Каменева, яўка датэрміновага галасавання склала 95—97%. "Багдановіцкая выбарчая акруга № 45, па якім балатавалася Каменева, гэта акруга, у якой знаходзяцца студэнцкія інтэрнаты. І наогул зразумела, што такі працэнт датэрміновага галасавання быў "нацягнуты" прымусова", — адзначыў Дашкевіч.
"Цяперашнія дэпутаты мясцовых саветаў — гэта самапрызначаныя людзі. Вынік такіх выбараў прызнаваць нельга. Акрамя таго, міжнароднай супольнасці варта ўлічваць, што на выбарах у мясцовыя саветы ўлада паказала, як яна будзе дзейнічаць на будучых прэзідэнцкіх выбарах", — заявіў Дашкевіч.
У кааліцыю "Новае пакаленне" ўваходзяць "Малады фронт", "Правы альянс", "МХСС — Маладыя дэмакраты", "Свабодная моладзь", грамадзянская кампанія "Ініцыятыва", Моладзь аргкамітэта па стварэнні партыі "Народная Грамада", маладзёжныя актывісты руху "Разам", "Моладзь БХД", "Моладзь БНФ".
Сяргей Пульша
БелаПАН
