Гэтымі днямі з'явілася яшчэ адна моладзевая грамадская кампанія, называецца яна «Наша армія». За мінулыя некалькі гадоў улада ўжыла так званы палітычны прызыў, калі ў войска прызываліся актывісты моладзевых грамадскіх арганізацый, прычым часта гэты прызыў выглядаў хутчэй на ізаляцыю маладых людзей ад грамадства.

І вось гэтыя маладыя людзі адслужылі ў войску і вырашылі паспрыяць паляпшэнню і ўмоваў службы, і адносінаў грамадства да салдатаў. Гаворыць адзін з лідэраў кампаніі «Наша армія» Іван Шыла:

- Мэта нашай кампаніі: скарачэнне службы, паляпшэнне ўмоваў службы. Мы хочам каб ільготы былі пры паступленні ў вну пасля вайсковай службы і каб людзі, якія служаць, мелі магчымасць навучацца завочна ў войску. У межах кампаніі мы плануем арганізваць некалькі дыскусійных сталоў, спадзяюся, што і з міністэрства абароны будуць прадстаўнікі. А таксама сабраць подпісы, каб прадэманстраваць, што нашы прапановы маюць падтрымку ў грамадстве.

Актывісты кампаніі тлумачаць, што яны гавораць толькі пра грамадскую частку Узброеных сілаў, пра парушэнні існага заканадаўства ў дачыненні да салдат, невыкананне зацверджаных нормаў і неабходнасць адкрытасці інфармацыі, датычнай, напрыклад, пазастатутных узаемаадносінаў.

Цягам наступных месяцаў актывісты кампаніі паспрабуюць прадэманстраваць падтрымку сваіх прапановаў з боку грамадства.