Наш адказ Чэмберлену!

Публікацыя артыкула “Белорусское политическое поле. Взгляд справа” на нашым сайце мела шырокі розглас на прасторах Байнэту і ў каляпалітычным асяродку. Артыкул адразу ж прыцягнуў увагу розных электронных СМІ- ад сайта “імперыя.бай” да “беларускага партызана”. Асаблівую нянавісць у каментатараў выклікала выказаная ў публікацыі дэкларацыя аб магчымым супрацоўніцтве з дзеючай уладай ў напрамку абароны беларускай дзяржавы.

Падкія на сенсацыі СМІ выдавалі нашу дэкларацыю за інфармацыйную бомбу, нечаканы паварот падзей. На “Правы Альянс” абрынулася хваля крытыкі і абвінавачванняў . За публікацыяй нашага артыкула некаторыя дзеячы адразу ж убачылі ўжо парадкам надакучыўшыя “вушы КДБ”, “руку Крамля” і “усёбачачае вока Адміністрацыі Прэзідэнта”. “Правы Альянс” абвінавацілі ў здрадзе (каму?!), а некаторыя структуры апусціліся да банальных знявагаў.

Адразу ж нагадаю, што “Правы Альянс” мае абавязкі толькі перад Радзімай, бо толькі Беларусі на вернасць прысягалі нашы сябры. А выказаныя ў артыкуле думкі аб неабходнасці супрацы з уладай у напрамку пабудовы нацыянальнай дзяржавы мы дэкларавалі ад пачатку сваей дзейнасці (тут), з гэтай мэтай “Альянс” прайшоў працэдуру рэгістрацыі.
Так што заклікаю грамадскасць не падымаць вэрхал, справа не ў сенсацыйным павароце, а ў мэтанакіраванай дзейнасці згодна стратэгічным планам арганізацыі.

Таксама паніку і дзявочы візг у апазіцыйных колах выклікалі выказаныя ў публікацыі ацэнкі працы палітычных кааліцый, партыяў і некаторых палітыкаў. Атрымліваецца, што пра “нашых змагароў за свабоду слова” можна пісаць толькі як пра пакойніка, альбо добра, альбо ніяк. Насамрэч любы дасведчаны чалавек разумее, што пераважная большасць ацэнак у артыкуле дадзены правільна і нават нашы крытыкі разумеюць гэта, але не жадаюць распісвацца ва ўласным бяссіллі, таму і паліваюць брудам “Правы Альянс”, бяспечна седзячы ва ўтульным доміку каля манітора.

Няправільную рэакцыю выклікала публікацыя і ў нашых партнёраў па БНБ. Сваім артыкулам “Альянс” хацеў паказаць неабходнасць сістэмнай працы згодна дэклараваных мэтаў, а не пустой балбатні па 3 гаадзіны падчас так званых “паседжанняў”. Усе альянсаўцы ў свой час прыязна паставіліся да падпісання БНБ, нацыянальныя сілы павінны працаваць разам. Але пытанне аб напрамках і мэтах сумеснай працы, негледзячы на дзесяткі “паседжанняў”, дагэтуль застаецца адкрытым, што, зразумела, выклікае незадаволенасць “Правага Альянсу”.

Шмат размоваў выклікаў тэзіс артыкула аб магчымай падтрымцы кандыдатуры Лукашэнкі на прэзідэнцкіх выбарах у выпадку яго супрацьстаяння з камуністамі. Скажам яшчэ раз, мы працуем НЕ супраць улады, а ЗА нацыянальную дзяржаву. Таму нам не прынцыпова якая асоба ці партыя будзе рэалізоўваць нацыянальны праект. Аб гэтым слушна і граматна выказаўся наш лідар Юрась Карэтнікаў.

Нашмат больш нам падабаецца лозунг “За моцную і квітнеючую Беларусь!”, чым “Хто заўгодна, толькі не Лукашэнка!”. Мы не збіраемся з мэтай звяржэння ўлады ўступаць у кааліцыі з нашымі ідэалагічнымі ворагамі і ворагамі беларускай дзяржавы, кшталту камуністаў і “новых апазіцыянераў” з НБП.

І напрыканцы: на сайце адной дохлай структуркі, мала прадстаўленай на Беларусі, але добра вядомай у прадстаўніцтвах замежных фондаў нас абазвалі маргіналамі.

Хачу нагадаць спадарам лібералам, што рэалізацыя нацыянальнага праекта непазбежная і праз некаторы час замест гранцікаў і справаздачаў ім прыйдзецца працаваць на заводах і будоўлях моцнай беларускай дзяржавы, альбо мыць талеркі ў Чайнатауне якой-небудзь еўрапейскай сталіцы, бо больш яны наўрад ці каму патрэбныя.

А за нас хай гавораць нашы справы! Так што, сябры- альянсаўцы, заклікаю з яшчэ большым энтузіязмам працаваць на карысць нашай Беларусі!

Кіраўнік Мінскага прадстаўніцтва ІКУ “Правы Альянс”
Аляксандр Шпакоўскі

Паводле "Правы Альянс"