Мінск, 27 красавіка. Ніводзін з кандыдатаў у дэпутаты ад кааліцыі маладзёжных арганізацый "Новае пакаленне" не абраны ў мясцовыя саветы. Пра гэта БелаПАН паведаміў лідэр міжнароднай арганізацыі "Малады фронт" (Чэхія) Дзмітрый Дашкевіч.

Паводле яго слоў, першапачаткова ад "Новага пакалення" мелі намер узяць удзел у выбарах 53 чалавекі. "Аднак у выніку збору подпісаў і падачы дакументаў на рэгістрацыю многія з іх зрабілі памылкі. У выніку было зарэгістравана кандыдатамі ў дэпутаты 22 чалавекі", — сказаў Дашкевіч.

Кандыдаты ў дэпутаты ад "Новага пакалення" не ставілі перад сабой мэту перамагчы на выбарах, адзначыў Дашкевіч. "У сучасных умовах перамагчы на выбарах немагчыма. Нам трэба было даць магчымасць маладым людзям набыць вопыт, адчуць на сабе, што такое выбарчая кампанія, як яе трэба праводзіць, як правільна падаваць дакументы і гэтак далей. Каб у будучыні, падчас нармальных, справядлівых і сумленных выбараў, пры іншай уладзе, яны мелі вопыт удзелу ў выбарах і маглі перамагчы ўжо тады", — заявіў лідэр "Маладога фронту".

Пры гэтым ён адзначыў, што былыя кандыдаты ў дэпутаты працягнуць дзейнасць у выбарчых акругах. "Яны пазнаёміліся з праблемамі свайго раёна і будуць у межах розных грамадскіх ініцыятыў вырашаць праблемы сваёй акругі. Яны не атрымалі мандат дэпутата, але яны атрымалі падтрымку ў грамадстве. Гэта важней за мандат", — лічыць Дашкевіч.

У кааліцыю "Новае пакаленне" ўваходзяць "Малады фронт", "Правы альянс", "МХСС — Маладыя дэмакраты", "Вольная моладзь", грамадзянская кампанія "Ініцыятыва", моладзь аргкамітэта па стварэнні партыі "Народная Грамада", моладзь руху "Разам", "Моладзь БХД", "Моладзь БНФ".

Сяргей Пульша
БелаПАН