24 гады мінула з моманту адной з самых жахлівых трагедыяў сьвету – Чарнобыльскай катастрофы. Катастрофа гэтая цяжкім адбіткам лягла на лёс нашага народу. Наступствы Чарнобыльскага выбуху можна было б у значнай ступені пазьбегнуць, каб савецкі рэжым клапаціўся не “захаваньнем спакою” і адпаведна сваёй улады, а лёсам людзей. Аднак савецкія правадыры разумелі, што маглі панаваць па-над народам толькі дзякуючы татальнай хлусьні. Таму пасьля выбуху на Чарнобыльскім рэактары людзей выганялі на “майскія сьвяты” – пад чарнобыльскія промні і дождж.

Сёньняшні рэжым у Беларусі – рэжым самаабвешчанага “прэзідэнта”, таксама трымаецца толькі на хлусьні. У беларускага народу скрадаюць праўду аб выбарах, аб зьніклых апанэнтах Лукашэнкі, аб тым, у рэшце рэшт, што беларуская нацыя вымірае – за час панаваньня Лукашэнкі насельніцтва Беларусі зьменшылася на 800 000 чалавек.

Таму моладзевая кааліцыя Новае Пакаленьне заклікае ўсіх грамадзянаў Беларусі прыйсьці 26 красавіка на "Чарнобыльскі Шлях", каб супрацьстаць выміраньню Беларусі – фізычнаму і духоваму чарнобылю ў нашай краіне! Каб абараніць Праўду, Свабоду і Справядлівасьць!

Збор удзельнікаў акцыі "Чарнобыльскі Шлях" адбудзецца 26 красавіка, а 18 гадзіне ля будынка Акадэміі Навук.