Моладзевая кааліцыя “Новае Пакаленьне” падводзіць вынікі этапу рэгістрыцыі кандыдатаў у дэпутаты. З 53 ініцыятыўных групаў, якія зьбіралі подпісы па ўсёй Беларусі, зарэгістравана 22 кандыдаты ў дэпутаты. Сябрамі ініцыятыўных групаў сабрана больш 10 тысячаў подпісаў у падтрымку кандыдатаў кааліцыі.

Сярод кандыдатаў “Новага Пакаленьня” адмоўлена ў рэгістрацыі пераважна лідэрам, якія рэалізоўвалі вельмі моцныя кампаніі на сваіх акругах. Так не прайшлі сіта рэгістрацыі старшыня “Правага Альянсу” Юрась Карэтнікаў, лідэр “Вольнай моладзі” Мікіта Красноў, намесьніца старшыні “Маладога Фронту” Наста Палажанка.

"Этап рэгістрацыі нашых кандыдатаў сьведчыць аб тым, што камісыі маюць прэтэнзіі і не рэгіструюць толькі дэмакратычных кандыдатаў. – Гаворыць кіраўнік перадвыбарчага штабу Новага Пакаленьня Зьміцер Кухлей. – Шэраг адмоваў нашым прэтэндэнтам у кандыдаты абсурдны – быццам некалькі чалавек у падпісных аркушах ня самі даты ставілі і г.д., некаторых выбарцаў прымушалі адмаўляцца ад сваіх подпісаў. Некаторыя з гэтых фактаў мы абскарджваем. Хацелася б, канешне, разабрацца з кожным выпадкам парушэньня законаў, але многія нашыя сябры ня маюць жаданьня губляць сілы і час на бязсэнсоўныя разьбіральніцтвы. Тыя кандыдаты "Новага Пакаленьня", каторых не зарэгістравалі, плянуюць удзельнічаць далей у выбарчай кампані дапамагаючы сваім паплечнікам".